uss
Exposiziun da Leander Albin
Finissaascha mesjamna, 7-10-2026 allas 18-19:30 uras
18.00–19.00 Concert: Chiara Jacomet & Marius Sommer
Chiara Jacomet ei ina artista multifara – diva da jazz, musa d’electropop e cantautura. Sia vusch ferma, stgira e samettada sco era sia preschientscha expressiva fascineschan il public. Cun texts che van sut la pial, metta ella en damonda normas socialas e confrunta ses auditurs cun damondas criticas – seigi quei per romontsch ni engles. Dils emprems muments sin tribuna sco affon entochen aclamadas appariziuns a festivals renomaus, entusiasmescha ella cun autenticitad e profunditad musicala.
Ensemen cul contrabassista da Langnau Marius Sommer presenta ella sias novas cumposiziuns romontschas en ina formaziun intima da duo. Ils dus musicists colligia ina collaboraziun da biars onns – Marius Sommer fa era part dil quintet da jazz contemporan "comet" da Jacomet. Ensemen creeschan els in’atmosfera musicala intima, nua che las canzuns vegnan raquintadas directamein e da maniera fetg persunala.
Chiara Jacomet (vusch, cumposiziun, texts)
Marius Sommer (contrabass)
suenter
28-11-2026
16-20 Vernissascha da l'exposiziun da Phil Lofthouse
Phil Lofthouse (*1976, Keighley, England) ei in artist engles-svizzer cun domicil a Glion. Suenter in studi da pictura en l’Engheltiara ei el vegnius en Svizra e, suenter biars onns el sectur da formaziun, ei el returnaus 2021 alla lavur artistica professiunala.
En siu luvratori artistic examinescha Lofthouse las fastitgs da temps, reparaziun ed intervenziuns humanas el spazi construiu. Detagls architectonics survesi, materials industrials e textiles vegnan transponi en sistems abstracts da reticulats, fuormas recurrentas e surfatschas stratificadas. Colur d’ieli, acrilica e spray sco era juta vegnan colligiadas cun structuras precisas, casualitad ed irregularitad.
Sia lavur pli nova s’occupescha dil fallir e dalla midada da sistems e considera la vulnerabilitad e la divergenza sco parts essenzialas dall’architectura e dall’experientscha humana.
Lofthouse ei commember da visarte e vegn representaus da Kunstfokus, Turitg. El ha exponiu surtut el Grischun.
Allas 18.00 concert da Quirina Lechmann, Alexa Deplazes ed Ahmad J. Hedar
fragile, fatale et fluide – mad scenes
Tgei schabegia, sch’ina dunna piarda la controla? Denter amur, desperaziun ed aspectativas socialas neschan entgins dils muments ils pli impressiunonts dalla historia dall’opera: las famosas „Mad Scenes“.
En quei concert scenic s’entaupan figuras femininas historicas cun ina vusch nova e plurilingua dil temps dad oz. Sper las scenas dalla narradad ord Lucia di Lammermoor da Donizetti, I puritani da Bellini e Hamlet da Thomas resunan las canzuns d’Ophelia da Richard Strauss – muments fragils denter lungatg, tun e dissoluziun.
Ina scena nova e plurilingua unescha alla fin treis maletgs archetipics da dunnas: femme fragile, femme fatale e femme fluide. Denter fragilitad, seducziun ed autodeterminaziun svaneschan ils cunfins denter rolla ed identitad.
In sera davart maletgs da dunnas, narradad e libertad – denter tradiziun d’opera e perspectiva contemporana.
Cun:
Quirina Lechmann, sopran
Alexa Deplazes, flauta traversa
Ahmad J. Hedar, piano
idea
La Scaffa Scumiada ei in spazi d’exposiziun, ina meisa radunda, in liug per occurrenzas ed in archiv d’artistas ed artists dalla Surselva.
Cun sis exposiziuns ad onn da persunas creativas dalla regiun e cun ina meisa radunda mintga dus meins, vegnan persunas activas ella cultura e persunas interessadas dalla cultura en contact e san brattar ideas ed experientschas.
La Scaffa Scumiada funcziunescha sco intermediatura e sco liug d’inscunter cultural.
Igl archiv vegn cumpletaus cuntinuadamein cun persunas activas ella cultura che lavuran en Surselva. Nus essan pia activamein alla tscherca da rimnar persunas da tuttas spartas culturalas, independentamein sche ellas han gia exponiu ni buca. Ei setracta d’ina collecziun fisica da carnets d’ovras, catalogs, dossiers, registraziuns audio e videos, che sa vegnir consultada sco part integrala dalla purschida.
Nus lessan possibilitar ina survesta dil crear cultural ella regiun e crear ina memoria per quel.
La cultura ei in factur impurtont che contribuescha a definir ina regiun. Perquei lessan nus render la cultura viventa ed accessibla. La Scaffa Scumiada ei concepida conscientamein per promover igl interess cultural dalla populaziun locala. Nus lessan mantener viv quella ierta culturala e vegnir in liug da sentupada e da barat.
nus engraziein: Kulturförderung Graubünden, Stiftung Stavros Niarchos, Stiftung Luzi Willi, Graubündner Kantonalbank, Vischnaunka Trun, Trun Turissem, Repower, Lia Rumantscha
uras d'avertura
mintgamai mesjamna dallas 16-19 uras